Бухоро давлат техника университетида бўлиб ўтган “Нақшбандийликнинг таълим ва ахлоқий тарбиядаги ўрни” мавзусидаги халқаро илмий конференцияда Ижтимоий фанлар кафедраси профессори Гулчеҳра Наврўзова ўзининг чуқур илмий мазмунга эга тақдимоти билан қатнашди. У ўз маърузасида Бухоро заминидан дунёга танилган маънавий мактаб – нақшбандийлик таълимотининг фалсафий ва ахлоқий жиҳатларини замонавий маърифий нуқтаи назардан ёритиб берди.

Профессор Наврўзова Баҳоуддин Нақшбанднинг инсон камолоти, маънавий етуклик ва жамиятда соғлом ахлоқий муҳит яратиш йўлидаги қарашларини таҳлил қилиб, ушбу таълимотнинг инсон онги ва қалбида эзгулик, поклик ҳамда масъулият ҳиссини шакллантиришдаги аҳамиятини таъкидлади. Ушбу таълимотда инсоннинг ички дунёсига назар ташлаш, ўз-ўзини англаш ва комиллик сари интилиш ғоялари устувор эканлиги таълим-тарбия жараёни билан боғлиқ ҳолда талқин этилди.

Тақдимот жараёнида “ичидан ташқарига” тамойили асосида инсоннинг маънавий ўзига хослиги, қалб тозалиги ва руҳий мувозанатни сақлаш каби тушунчалар илмий-назарий нуқтаи назардан кенг ёритилди. Гулчеҳра Наврўзова таъкидлаганидек, бу ғоялар замонавий таълим тизимида фақат ахлоқий қадриятларни мустаҳкамлаш эмас, балки ёш авлоднинг мустақил фикрлайдиган, масъулиятли ва ижтимоий фаол шахс сифатида шаклланишига ҳам хизмат қилади.

Профессор Наврўзованинг маърузаси нафақат нақшбандийлик таълимотининг фалсафий моҳиятини очиб берди, балки унинг ахлоқий тарбия, маънавий етуклик ва инсонпарварлик ғояларини тарғиб этишдаги амалий аҳамиятини ҳам намоён этди.

Ушбу маъруза конференция иштирокчилари орасида катта қизиқиш уйғотди, таълим ва маънавият соҳасидаги илмий мулоҳазалар учун янги илҳом манбаи бўлди. Профессор Гулчеҳра Наврўзованинг изланишлари ва тақдимоти нақшбандийликнинг маънавий меросини замонавий таълим жараёнларига уйғунлаштириш, миллий ғоя ва қадриятларни чуқур англаш йўлида муҳим қадам бўлиб хизмат қилди.

Қуйидаги ҳаволалар орқали тақдимот билан яқиндан танишишингиз мумкин:

• Ўзбек тилидаги тақдимотни кўриш
• View presentation in English